د تخار لپاره د طالبانو د نظامي کمېسیون مسوول وژل شوی دی

کورنیو چارو وزارت تخار ولایت کې د طالبانو د نظامي کمېسیون د مسوول مولوي بشیر د وژل کېدو او د هغه د مرستیال د نیول کېدو خبر ورکړی دی.

د جمهور خبري آژانس د خبر له مخې کورنیو چارو وزارت نن چهارشنبې د کب ۱۴ مه خبرپاڼه کې ویلي، مولوي بشیر د تخار لپاره د طالبانو د تش په نوم نظامي کمېسیون مشر او قاري یعقوب یې مرستیال و.

سرچینه وايي، طالبانو د تخار – کندوز پر لویه لار ملکي خلک او امنیتي ځواکونه هدف وګرځول، چې د افغان ځواکونو له کلک غبرګون سره مخ شول.

په خبرپاڼه کې ویل شوي، چې د افغان ځواکونو په ځوابیه برید کې د مولوي بشیر په ګډون درې وسله وال طالبان وژل شوي او څلور نور ټپیان شوي دي.

کورنیو چارو وزارت وایي، په دغه جګړه کې د طالبانو د نظامي کمېسیون مرستیال قاري یعقوب له یوه بل مهم غړي سره یو ځای نیول شوي دي.

د وزارت په وینا په دغه جګړه کې د افغان ځواکونو یو سرتېری هم شهید شوی او پنځه نور ټپیان شوي دي.

طالبانو تر اوسه په دې اړه څه نه دي ویلي.

جمهورخبري آژانس:کابل