د ملګرو ملتونو وروستی راپور د طالبانو امریکا د موافې ناکامولو په پار خپور شوی

وسله والو طالبانو د ملګرو ملتونو هغه راپور په کلک رد او بې اساسه وباله، چې ویلي یې دي، طالبان له القاعده سره اړیکې لري او په منځ کې یې اختلافات رامنځ ته شوي.

د جمهور خبري آژانس د خبر له مخې د ملګرو ملتونو په راپور کې، چې د تېرې دوشنبې غبرګولي ۱۲ مه خپور شوی دی، راغلي، چې طالبانو له القاعده سره اړیکې نه دي پرېکړې او دغه ډله لا هم په افغانستان له ۴ تر ۵ سوه پورې روزنیز مرکزونه لري.

دغه راز په دې راپور کې دا هم ویل شوی و، چې د طالبانو په منځ کې د حزب ولایت په نوم یوه بله ډله راپورته شوې، چې د طالبانو او امریکا د کړې موافقې مخالفه ده.

سرچینې ویلي و، همدې ستونزو ته په کتو کېدای شي، د امریکا او طالبانو تر منځ شوې موافقه له ستونزو سره مخ او ماته شي.

د دې ترڅنګ فارن پالیسي د ځینو طالب سرچینو له قوله ویلي و، چې د دوی مشر ملا هبت الله د کرونا ویروس له امله مړ شوی، سراج الدین حقاني هم په دغه ناروغۍ اخته او اوس ټولې چارې ملا یعقوب مخ ته وړي، چې د مشرتابه پر سره هم د طالبانو په منځ کې اختلاف رامنځ ته شوی.

خو طالبانو هم د ملګرو ملتونو او هم د فارن پالیسي راپورونه په کلکه رد کړي او ویلي یې دي، چې دا د لوېدیځو رسنیو تبلیغات دي، چې هڅه کوي، د طالبانو او امریکا تر منځ کړې موافقه ناکامه کړي.

د طالبانو د قطر د دفتر ویاند سهیل شاهین نن د ملګروملتو راپور په لکه رد کړی ویلي یې دي، په راپور کې د اسلامي امارتپه اړه ناسمې، استخباراتي او عُقدې څرګندونې شوي دي.

شاهین د طالبانو په منځ کې د درز ادعا هم رد کړی وايي، د طالبانو لیکې متحدې، یو لاس او هیڅ راز انشعاب او بېلتون پکې نشته.

د هغه په وینا د اسلامي امارت ټول مجاهدین  د خپلو مشرانو پرېکړې په کلکه رعایتوي او تېر اوربندونه دا حقیقت ثابتوي.

نوموړي زیاته کړې«موږ له امریکا سره پر لاسلیک شوې موافقه، چې د ملګروملتو امنیت شورا هم تایید کړې ده، کلک ژمن یوو او د ځان له لوري په موافقې کې راغلي ژمنې عملي کوو.»

شاهین د ملګروملتو په راپور کې د طالبانو او القاعده شبکې د اړیکو دوام ته اشاره ویلي، د موافقې پر اساس اسلامي امارت هیچا ته اجازه نه ورکوي چې د افغانستان له خاورې څخه د چا د امنیت پر ضد کار واخلي، یا دلته د چا د تاوان لپاره روزنیز کمپونه جوړ کړي او یا زموږ له خاورې څخه په استفادې د چا پر ضد چنده ټوله کړي.

شاهین د ملګروملتو د راپور هدف په مجموع کې د امریکا او طالبانو ترمنځ د سولې د موافقې ناکامول، په هیواد کې د جګړو د اور تود ساتل او د ده په وینا د ځینو دښمنو او استخباراتي کړیو د ناروا ګټو ساتل بللي دي.

د هغه په وینا د امریکا او طالبانو موافقه په افغانستان کې د دایمي امنیت، سولې او د جګړې د پای ته رسېدا مهمه وسیله او وثیقه ده.

د طالبانو د قطر دفتر و یاند سهیل شاهین ټینګار کړي، چې د ځینو دښمن او استخباراتي کړیو ګټې د جګړې له دوام سره تړلي دي.

جمهورخبري آژانس:کابل