اخراج اجباری مهاجران افغان از تاجیکستان؛ رحمان و گوترش گفتگو کردند

پس از انتقاد سازمان ملل متحد از اخراج اجباری مهاجران افغان از تاجیکستان، امام علی رحمان رییس جمهور تاجیکستان و آنتونیو گوترش دبیر کل سازمان ملل باهم صحبت کردند.

به گزارش خبرگزاری جمهور؛ دفتر ریاست جمهوری تاجیکستان اعلام کرده که امام‌علی رحمان در این گفتگوی تلفنی خواهان ادامه کمک‌های بشردوستانه جامعه جهانی به مردم افغانستان شده‌است.

آقای رحمان گفته است که جهان نباید مردم رنج دیده افغانستان را در شرایط سخت کنونی تنها بگذارد.

او گفته که تاجیکستان آمادگی دارد تا قابلیت‌های تدارکاتی خود را برای کمک به مردم افغانستان در اختیار جامعه جهانی قرار دهد.

این در حالی است که کمیشنری عالی سازمان ملل متحد در امور پناهندگان به تازگی از دولت تاجیکستان بخاطر اخراج اجباری مهاجران افغان به شدت انتقاد کرده‌است.

این سازمان با نشر اعلامیه‌ای هشدار داده است که بازگشتاندن مهاجرینی که به دلیل اذیت و آزار از کشور خود فرار کردند، یک اقدام غیرقانونی است و این کار زندگی آنان را با خطر مواجه می‌سازد.

به گفته این اداره، دولت تاجیکستان به تاریخ 23 آگیست، پنج مهاجر افغان، به شمول سه کودک و مادر شان را با وجود مداخله کمیشنری عالی ملل متحد در امور پناهندگان از طریق بندر "پنج‌پایان" در جنوب آن کشور به افغانستان بازگردانده‌است.

الیزابت تان، مسوول حفاظت بین‌المللی کمینشری عالی ملل متحد در امور پناهندگان، گفته است: "ما از تاجیکستان می‌خواهیم که بازداشت و اخراج پناهجویان را متوقف کند، اقدامی که به گونۀ واضح زندگی آنان را با خطر مواجه می‌سازد."

او افزوده است که اخراج اجباری پناهجویان خلاف قوانین مهاجرت و در مغایرت با اصل عدم اخراج است.

ملل متحد تاکید کرده که از سال گذشته‌ به این‌سو، این سازمان موارد زیادی از توقیف مهاجرین و اخراج اجباری پناهجویان را در تاجیکستان ثبت کرده‌است.

به باور این سازمان با اخراج این مهاجرین، آنان در کشور شان مورد اذیت و آزار قرار خواهند گرفت که این کار نقض جدی قوانین بین‌المللی‌است.

گفتنی است که پس از تسلط طالبان بر افغانستان، صدها خانواده مهاجر به تاجیکستان رفته که گفته می‌شود در وضعیت بدی به سر می‌برد.

دولت تاجیکستان قیودات بسیار سختگیرانه در مورد مهاجران افغان دارد.

خبرگزاری جمهور- کابل