پاکستانی‌ها و تاجیکستانی‌ها در حملات بر مکان‌های مذهبی دست دارند

سرپرست وزارت دفاع گروه طالبان می‌گوید که شهروندان پاکستانی و تاجیکستانی در حملات بر مکان‌های مذهبی افغانستان دست دارند.

ملا محمد یعقوب مجاهد سرپرست وزارت دفاع گروه طالبان امروز یک‌شنبه(10 جدی) در یک نشست خبری کمیسیون امنیتی این گروه گفته که در حملات بر مساجد، خانقاه‌ها، مدارس دینی و علمای دین در افغانستان صورت گرفته است، شهروندان خارجی به‌ویژه شهروندان تاجیکستانی دست دارند.

او گفته که در درجه دوم در تنظیم بسیاری از حملات در افغانستان شهروندان پاکستانی نیز دست داشته‌اند.

این طالب ادعا کرده که در مدت 12 ماه گذشته ده‌ها شهروند تاجیکستانی را به اتهام‌های مختلف از سوی بخش‌های امنیتی کشته و صدها تن دیگر شان بازداشت شده‌اند.

سرپرست وزارت دفاع  گروه طالبان از کشورهای منطقه خواسته تا مرزهای زمینی و هوایی‌شان را کنترل کنند.

این گفته‌های گروه طالبان در حالی مطرح می‌شوند که این گروه در 20 سال گذشته، به بهانه جهاد هزاران افغان بی گناه را به کام مرگ کشاندند.

خبرگزاری جمهور