نگرانی اداره مهاجرت کانادا از اخراج مهاجران افغان توسط تاجیکستان
يکشنبه ۱۹ اسد ۱۴۰۴ ساعت ۱۷:۳۸
اداره مهاجرت، پناهندگان و شهروندی کانادا با ابراز نگرانی عمیق از گزارش‌های اخراج مهاجران افغان توسط تاجیکستان، اعلام کرد که با همکاری سازمان‌های بین‌المللی در تلاش است تا از حمایت و حفاظت شهروندان افغانستان که قرار است در کانادا اسکان یابند، اطمینان حاصل کند.
در این بیانیه آمده است: «ما با همکاری سازمان بین‌المللی مهاجرت (IOM) و کمیشنری عالی پناهندگان ملل متحد (UNHCR) در تلاش هستیم تا از حفاظت و حمایت شهروندان افغانستان که قرار است در کانادا اسکان داده شوند، اطمینان حاصل کنیم.»
بر اساس اطلاعات منتشرشده، حدود 3000 مهاجر افغان که تحت حمایت مالی دولت کانادا در تاجیکستان به‌سر می‌برند، در انتظار بررسی پرونده‌های پناهندگی خود هستند.
با این حال، این مهاجران با دستور اخراج از سوی دولت تاجیکستان مواجه شده‌اند، امری که نگرانی‌های جدی را در مورد وضعیت انسانی آن‌ها به‌وجود آورده است.
اداره مهاجرت کانادا تأکید کرده است که اولویت این اداره، تضمین ایمنی و حمایت از این مهاجران است. این اداره همچنین از دولت تاجیکستان خواسته است تا در تصمیم‌گیری‌های خود، وضعیت شکننده مهاجران افغان را در نظر بگیرد.
کد مطلب: 184856
