مقتي د اقتصادي همکاریو د پیاوړتیا لپاره له چینایي چارواکي سره وکتل

د طالبانو د بهرنیو چارو سرپرست وزیر امیر خان متقي د چین د پراختیایي همکارۍ ادارې له مشر چن شیاوډونګ سره وکتل او دواړو خواوو د افغانستان د اقتصادي بیارغونې لپاره د پراختیایي پروژو او دوه اړخیزو همکاریو په اړه خبرې وکړې.

د جمهور اژانس د راپور له مخې، په دې غونډه کې د چین د پراختیایي پروژو او د افغانستان د اقتصادي زیربناوو د بیارغونې په برخه کې د دوه اړخیزو همکاریو په پیاوړتیا تمرکز وشو. امیر خان متقي د بیارغونې په پروژو کې د چین د پراختیایي همکارۍ ادارې د هڅو ستاینه وکړه او ویې ویل: "د امنیت له ډاډمنولو وروسته، زموږ تر ټولو لوی مسؤلیت د هیواد اقتصادي بیارغونه ده، او د طالبانو ډله، له خپلو ټولو سرچینو څخه په استفادې سره، دې سکتور ته ځانګړې پاملرنه کوي."

هغه همدارنګه هیله څرګنده کړه چې د افغانستان او چین ترمنځ نږدې همکاري به د کرنې، انرژۍ او اوږدمهاله پروژو په برخو کې پراخه شي.

متقي چینایي لوري ته ځانګړي عملي وړاندیزونه وړاندې کړل چې د افغانستان د بیارغونې لومړیتوبونو سره سم کارول کیدی شي.

له بلې خوا، د چین د پراختیایي همکارۍ ادارې مشر چن شیاوډونګ ژمنه وکړه چې هیواد به یې د روغتیا، انرژۍ، کرنې او ظرفیت لوړولو په برخو کې له افغانستان سره همکاري وکړي.

هغه همدارنګه له افغانستان سره د چین پر دوامداره همکارۍ ټینګار وکړ او د هیواد پلانونه یې اعلان کړل چې د بنسټیزو زیربناوو د جوړولو، مالدارۍ او په افغانستان کې د تیلو او ګازو د سرچینو د استخراج د امکاناتو د سپړلو ملاتړ کوي.

دا غونډه په داسې حال کې وشوه چې د طالبانو ډله، په ۲۰۲۱ کال کې د افغانستان د کنټرول له ترلاسه کولو وروسته، هڅه کوي چې د بهرني پانګونې په راجلبولو سره، په ځانګړې توګه د سیمې هیوادونو لکه چین څخه، د هیواد د جنګ ځپلي اقتصاد بیا رغونه وکړي.

د زیربناوو او طبیعي سرچینو په برخو کې د چین همکاري کولی شي د دې هدف په ترلاسه کولو کې مهم رول ولوبوي. خو، د طالبانو له خوا د نړیوالې همکارۍ د جلبولو هڅې په داسې وخت کې کیږي چې دا ډله د پراخو بشري حقونو سرغړونو، په ځانګړې توګه د ښځو او اقلیتونو د ځپلو او په مدني آزادیو باندې د سختو محدودیتونو لګولو له امله د نړیوالې ټولنې له سختو نیوکو سره مخ ده.

د طالبانو سختې پالیسۍ، چې پکې د ښځو د زده کړې او کار څخه منع کول او د رسنیو ځپل شامل دي، نه یوازې د افغانستان دوامداره پرمختګ ته خنډ ګرځیدلی، بلکې د هیواد د بیارغونې او پرمختګ لپاره یې د دې ډلې ژمنو باندې د نړیوالې ټولنې باور هم سخت زیانمن کړی دی.

جمهورخبري آژانس