طالبانو د صنعتي ښارګوټو د جوړولو لپاره ۸۰۰۰۰ جریبه ځمکه ځانګړې کړې ده

د طالبانو د اقتصادي چارو مرستیال دفتر اعلان کړی چې د صنعتي ښارګوټو د جوړولو لپاره یې ۸۰۰۰۰ جریبه ځمکه د دې ډلې د صنعت او سوداګرۍ وزارت ته سپارلې ده.

د جمهور اژانس د راپور له مخې، د طالبانو د اقتصادي مرستیال د رسنیو دفتر تېره شپه ناوخته (د غبرگولي ۵ مه) په یوه اعلامیه کې وویل چې په ۲۸ ولایتونو کې د صنعتي ښارګوټو د جوړولو لپاره شاوخوا ۸۰۰۰۰ جریبه ځمکه د صنعت او سوداګرۍ وزارت ته لیږدول شوې ده.

طالبانو ویلي چې تر اوسه پورې، د ډلې د غیر حاضر مشر د امر پر بنسټ، شاوخوا ۸۰۰۰۰ جریبه ځمکه د صنعت او سوداګرۍ وزارت ته لیږدول شوې ده ترڅو په ۲۸ ولایتونو کې ۳۶ صنعتي زونونه جوړ کړي.

په اعلامیه کې راغلي چې د دې ډلې د صنعت او سوداګرۍ وزارت په ۸ ولایتونو کې ۱۲۵ شرکتونو ته ۶۴۹.۵ جریبه ځمکه ویشلې ده.

طالبان وايي چې د صنعتي ښارګوټو د جوړولو لپاره د ځمکې د تخصیص پروسه د چاپیریال ساتنې د اصولو او ښاري ماسټر پلان سره سم د یوې ځانګړې طرزالعمل پر بنسټ ترسره کیږي.

جمهورخبري آژانس