طالبانو او قرغزستان د لوژستیکي مرکز د جوړولو او سوداګریزو اړیکو پر پیاوړتیا خبرې کړې

د طالبانو د صنعت او سوداګرۍ وزارت او د قرغزستان د سفارت سرپرست وزیر د ټرانزیټ او لوژستیکي اسانتیاوو د برابرولو لپاره د لوژستیکي مرکز د جوړولو په اړه بحث وکړ.

د جمهور خبري آژانس د خبر له مخې د طالبانو د صنعت او سوداګرۍ وزارت د یکشنبې په ورځ (د غبرګولي ۲۵ مه) په یوه اعلامیه کې وویل چې د وزارت سرپرست وزیر نورالدین عزیزي په کابل کې د قرغزستان د سفارت سرپرست وزیر تورداکون سیدیکوف سره ولیدل.

دواړو لوریو په مختلفو مسلو بحث وکړ، په شمول د سوداګریزو اړیکو د پراختیا لپاره د دواړو لوریو ترمنځ د لارې نقشه جوړول، د دواړو هېوادونو د خصوصي سکتور فعالینو ترمنځ د سوداګرۍ لپاره اسانتیاوې برابرول، د سوداګرۍ، ټرانزیټ او پانګونې تړونونو لاسلیک کول، د ټرانزیټ او لوژستیکي اسانتیاوو د برابرولو لپاره د لوژستیکي مرکز جوړول، او افغانستان ته د قرغزستان جمهوریت بشري مرستې.

د قرغزستان سرپرست سفیر د هغه هیواد د اقتصاد او سوداګرۍ وزیر لخوا د طالبانو د صنعت او سوداګرۍ سرپرست وزیر ته رسمي بلنه وړاندې کړه چې د روان کال په اګست کې د بشکیک په فورم کې ګډون وکړي.

عزیزي د منځنۍ اسیا له هېوادونو سره د اقتصادي اړیکو په پیاوړتیا ټینګار وکړ، د اقتصاد او سوداګرۍ وزیر د بلنې او افغانستان ته د قرغزستان د پلاوي د سفر هرکلی یې وکړ؛ هغه وړاندیز وکړ چې افغانستان ته د هغه هېواد د پلاوي د سفر په جریان کې، په کابل کې د قرغزستان د محصولاتو او تولیداتو نندارتون جوړ شي او همدارنګه که چیرې د اقتصاد او سوداګرۍ وزیر په مشرۍ د هغه هېواد پلاوی ګډون وکړي، نو د تړونونو لاسلیک به په همغږۍ او لوړه کچه ترسره شي.

جمهورخبري آژانس