راتلونکې اونۍ له ایران سره خبرې اترې وکړو؛ ممکن یوه موافقه هم لاسلیک شي

د امریکا ولسمشر وايي، موږ به راتلونکې اونۍ له ایران سره خبرې اترې وکړو او یوه موافقه هم لاسلیک شي.

د جمهور اژانس د خبر له مخې، د امریکا ولسمشر ډونالډ ټرمپ تېره شپه د ناټو د سرمشریزې په جریان کې د ایران پر اټومي تاسیساتو د امریکا بریدونه یوه بریا وبلله او ویې ویل چې په دې برخه کې به د تهران پر وړاندې د فشار پالیسي دوام ولري.

هغه زیاته کړه چې له ایران سره به راتلونکې اونۍ خبرې اترې وشي او حتی یوه موافقه هم لاسلیک شي.

ټرمپ دا ادعا هم وکړه چې د ایران پر اټومي تاسیساتو برید سره، امریکا یو ځل بیا نړۍ ته وښودله چې د خپلو دښمنانو د مخنیوي وړتیا لري.

هغه وویل چې واشنګټن به ډیر ژر د ایران د اټومي تاسیساتو د زیان د کچې جزئیات خپاره کړي او په ورته وخت کې یې ځینې امریکایي رسنۍ تورنې کړې چې د غلطو معلوماتو سره د دې بریدونو پایلو باندې شک څرګندوي.

د ایران او اسراییلو ترمنځ د ۱۲ ورځو بې ساري جګړې په جریان کې، امریکا بالاخره مداخله وکړه، په فوردو، نتانز او اصفهان کې یې په دریو ایراني اټومي تاسیساتو بریدونه وکړل.

په ځواب کې، ایران په قطر کې د امریکا پوځي اډې په نښه کړې، او له بریدونو څو ساعته وروسته، ټرمپ په ناڅاپي ډول د ایران او اسراییل ترمنځ اوربند اعلان کړ، چې دواړو خواوو ومنله.

جمهورخبري آژانس