د یوناما مرستیال: په افغانستان کې د اقلیم بحران روان دی

په افغانستان کې د ملګرو ملتونو د سیاسي مرستو د ماموریت مرستیال وايي چې په افغانستان کې د اقلیم بحران اوږدمهاله ګواښ نه دی، بلکې همدا اوس روان دی.

د جمهور خبري آژانس د خبر له مخې، په افغانستان کې د ملګرو ملتونو د سیاسي مرستو د ماموریت مرستیالې اندریکا راتواټ، نن یکشنې  (د زمري ۵ مهمه) وویل چې په افغانستان کې د اقلیم بحران اوږدمهاله ګواښ نه دی؛ بلکې دا اوس روان دی او د دې هیواد ټول اتباع پرې تکیه کوي او ژوند، معیشت او طبیعي جوړښتونه یې اغیزمن کړي دي.

هغه زیاته کړه: «نړۍ باید د انرژۍ د لیږد لپاره د ملګرو ملتونو د عمومي منشي له وړاندیز څخه ګټه پورته کړي، ځکه چې نړیوال اقدام د افغانستان لپاره حیاتي دی، او د ملګرو ملتونو عمومي منشي انتونیو ګوتریس نړۍ ته د انرژۍ د نوي دور د پیل لپاره یو مهم غږ کړی دی.»

د ملګرو ملتونو عمومي منشي د فوسیلي سونګ توکو څخه د نوي کیدونکي انرژۍ ته د لیږد اړتیا لپاره دلیلونه وړاندې کړي او هغه پراخې ګټې یې تشریح کړې چې دا لیږد به خلکو او اقتصادونو ته راوړي.

اندریکا راتواټ وايي چې د نه اقدام پایلې به نه یوازې د افغانانو لپاره، بلکې د سیمه ایز ثبات او نړیوالو بشري هڅو لپاره هم ویجاړونکې وي.

د افغانستان لپاره د ملګرو ملتونو مرستیالې ځانګړې استازې زیاته کړه چې په افغانستان کې د ملګرو ملتونو دفتر خپلې هڅې ګړندۍ کړې دي ترڅو د اقلیم د بدلون اغیزې کمې او ورسره تطابق وکړي.

هغې ټینګار وکړ چې موږ د اوبو امنیت، هوښیار زیربنا، پاکې انرژۍ ته د لیږد، ځمکې او ایکوسیستم بیارغونې، د ناورین د خطر کمولو او د ټولنو د انعطاف پیاوړتیا په برخو کې د افغانانو ملاتړ کوو.

جمهورخبري آژانس