رهبران پاکستان و تاجیکستان در مورد افغانستان گفتگو کردند

رسانه‌های پاکستانی گزارش داده‌اند که عمران خان نخست وزیر این کشور و امام علی رحمان رییس جمهور تاجیکستان در باره کاهش تنش میان افغانستان و تاجیکستان گفتگو کرده‌اند.

به گزارش خبرگزاری جمهور؛ دفتر نخست وزیر پاکستان اعلام کرده که عمران خان و امام علی رحمان روز گذشته شنبه (10 میزان) از طریق یک گفتگوی تلیفونی بر تامین صلح و ثبات در افغانستان تاکید کردند.

در این گفتگو، دو طرف همکاری‌ برای تامین صلح و ثبات در افغانستان را مهم دانسته اند.

در اعلامیه آمده است: "رهبران پاکستان و تاجیکستان توافق کردند که تماس شان را از بهر ادامه هماهنگی تلاش‌های شان در پشتیبانی از صلح و ثبات در افغانستان، ادامه بدهند."

همچنین، روزنامۀ دان پاکستان به نقل از منابع دپلوماتیک می‌گوید که در این صحبت تیلفونی، عمران خان بر کاهش تنش‌ها میان افغانستان و تاجیکستان تأکید کرده است.

این در حالی است که اخیراً تنش میان افغانستان و تاجیکستان بیشتر شده است.

دولت تاجیکستان، طالبان را در افغانستان به نسل کشی تاجیکان به ویژه در پنجشیر متهم کرده و خواهان سهم تاجیکان افغانستان در قدرت سیاسی شده است؛ اما در مقابل طالبان، تاجیکستان را به مداخله در امور داخلی افغانستان متهم کرده است.

در پی این تنشها دو طرف نیروهای نظامی بیشتر نیز در مرز جابجا کرده اند.

ایجاد تنش‌ها میان دو کشور همسایه باعث نگرانی جدی کشورهای منطقه گردیده است.

در پی افزایش تنش‌ها دولت روسیه از تاجیکستان و افغانستان خواسته بود که تنش‌های موجود میان شان ‌را از راه گفتگو حل نمایند.

خبرگزاری جمهور- کابل