کوچ اجباری با حمایت طالبان؛ این بار در جوزجان

رییس کمیسیون حقوق بشر افغانستان از کوچ اجباری اوزبیک‌ها و ترکمن‌ها درولایت جوزجان با حمایت طالبان، ابراز نگرانی کرده است.

به گزارش خبرگزاری جمهور؛ خانم اکبر امروز دوشنبه (۸ قوس) در تویترش نوشته که گزارش های نگران کننده ای را در مورد کوچ اجباری اوزبیک ها و ترکمن ها در جوزجان دریافت کرده است.

به گفته او، برخی منابع گفته اند که هزاران جریب زمین و خانه‌های باشندگان ترک تبار ولسوالی قوش‌تپه ولایت جوزجان با حمایت طالبان از سوی کوچی‌ها غصب شده‌است.

او همچنین، به کوچ اجباری هزاره‌ها در ولایت دایکندی نیز اشاره کرده است.

رییس پیشین کمیسیون مستقل حقوق بشر افغانستان که می‌گوید، به این جابه‌جایی‌های اجباری باید پایان داده شود و هیچ گروهی از مردم نباید در ترس زندگی کنند.

به گفته او، امروز دوشنبه گروه‌هایی از مردم قوش‌تپه ولایت جوزجان در اعتراض به کوچ اجباری شان با حمایت طالبان، تظاهرات نیز کردند.

معترضان می‌گویند کوچی‌ها با پشتیبانی مقام‌های محلی طالبان، افزون بر زمین و خانه، موترها و تراکتورهای آن‌ها را هم گرفته‌اند.

آن‌ها می‌گویند کسانی که با کوچی‌های غیربومی مخالفت کرده‌اند، از سوی طالبان زندانی و شکنجه شده‌اند.

خبرگزاری جمهور- کابل