تاجیکستان در نقاط مرزی با افغانستان مانور نظامی برگزار کرد

برخی منابع محلی در تخار می‌گویند که نیروهای مرزی تاجیکتسان در نقاط مرزی با افغانستان مانور نظامی برگزار کرده اند.

به گزارش خبرگزاری جمهور؛ به گفته منابع محلی، این مانور نظامی به روز جمعه (8 دلو) در امتداد مرزهای افغانستان با تاجیکستان در ولسوالی آی‌خانم ولایت تخار برگزار شده است.

یک منبع موثق به روزنامه 8صبح گفته که نیروهای مرزی تاجیکستان در این مانور نظامی از سلاح‌های سبک و سنگین استفاده کرده‌اند.

گفتنی است که پس از تسلط طالبان بر افغانستان، تاجیکستان تا هنوز بارها مانور مستقل و مشترک نظامی در مرز با افغانستان برگزار کرده است.

چندی پیش کشورهای عضو پیمان امنیت جمعی نیز در نزدیکی مرزهای افغانستان مانور مشترک نظامی برگزار و هدف آن را مقابله به گروه‌های هراس‌افگن به ویژه داعش عنوان کردند.

تاجیکستان نگران فعالیت گروه های تندرو در امتداد مرزهای خود با افغانستان است.

اما طالبان به تمامی کشورهای همسایه اطمینان داده اند که هیچ تهدیدی از افغانستان برای هیچ کشور بیرونی، متوجه نخواهد شد.

خبرگزاری جمهور- کابل