۰

په ۲۰۱۹ کال کې کابو ۱۱ زره افغانانو ته مرګ ژوبله اوښتې ده

سی شنبه ۱۵ دلو ۱۳۹۸ ساعت ۱۳:۴۷
د افغانستان د بشري حقونو خپلواک کمېسیون وايي، په ۲۰۱۹ میلادي کال کې کابو ۱۱ زره ملکي افغانان په جګړو کې وژل شوي او ټپیان شوي دي.
په ۲۰۱۹ کال کې کابو ۱۱ زره افغانانو ته مرګ ژوبله اوښتې ده
د افغانستان د بشري حقونو خپلواک کمېسیون وايي، په ۲۰۱۹ میلادي کال کې کابو ۱۱ زره ملکي افغانان په جګړو کې وژل شوي او ټپیان شوي دي.

د جمهور خبري آژانس د خبر له مخې د کمېسیون چارواکو چې نن سه شنبې د سلواغې ۱۵ مه کابل کې د یوې خبري ناستې پر مهال خپل کلنۍ راپور خپراوه و ویل، چې په ۲۰۱۹ میلادي کال کې د ملکي وګړو په مرګ ژوبله کې ۷ سلنه کموالی راغلی دی.

د یاد کمېسیون مرستیال نعیم نظري وایي، په ۲۰۱۹ میلادي کال کې د جګړو له امله ۱۰ او ۷۷۲ کسانو ته مرګ ژوبله اوښتې، چې ۶ زره او ۸۴۵ تنه یې نارینه، ۲۶۹۶ یې ماشومان او ۹۷۴ تنه یې مېرمنې دي.

دی زیاتوي، چې په کال ۲۰۱۸ کې د ملکي افغانانو مرګ ژوبله ۱۱ زره او ۷ سوه وه، چې دغه شمېره سږ کال ۷ سلنه کموالی ښيي، چې له دې ډلې د سړیو په مرګ ژوبله کې ۱۳ سلنه کموالی راغلي، خو د مېرمنو په مرګ ژوبله کې بیا ۳ او د ماشومانو مرګ ژوبله کې بیا یو سلنه زیاتوالی راغلی دی.

دی وایي، چې د یادې مرګ ژوبلې ۷۱ سلنه عامل وسله وال طالبان، ۵ سلنه یې داعش او ۱۴ سلنه یې بیا افغان او بهرني ځواکونه دي.

په ورته وخت کې نوموړي دا هم و ویل، چې په ټول کې د مخالفینو په بریدونو کې د ملکي وګړو تلفاتو کې ۲۷ سلنه کموالی راغلی او د افغان او بهرنیو ځواکونو په بریدونو کې بیا ۴۴ سلنه کموالی تر سترګو کېږي.

خو زیاته یې کړه، چې په چاودنو کې بیا د مرګ ژوبلې شمېر بیا لوړ شوی او دغه چاره په ۲۰۱۹ کال کې ۲۹ سلنه پورته شوې ده.

د افغانستان د بشري حقونو کمېسیون وايي، چې سږ کال په ځمکنیو جګړو کې د ملکي تلفاتو کچه ۸ سلنه، د هدفي وژنو کچه ۱۳ سلنه او د شپنیو عملیاتو مرګ ژوبله ۷۹ سلنه زیاته شوې ده، په داسې حال کې، چې د ځانمرګو بریدونو کچه بیا ۴۵ سلنه کمه شوې او د هوايي بریدونو کچه هم ۲۱ سلنه ټیټه شوې ده.

د یاد کمېسیون مرستیال زیاته کړه، چې د سږ کال د تلفاتو په ګډون په تېرو لسو کلونو کې په ټول کې ۵۸ زره ملکي افغانانو ته مرګ ژوبله اوښتې ده.

د افغانستان د بشري حقونو کمېسیون د جګړې پر ښکېلو غاړو غږ وکړ، چې د ملکي وګړو ژوند ته جدي پاملرنه وکړي او دغه راز یې له افغان حکومت څخه وغوښتل، چې د ملکي تلفاتو عاملین د قانونو منګولو ته وسپاري.

جمهورخبري آژانس:عبدالجلیل سروش
 
 
ستاسو نوم

ستاسو دبرېښنا ليک پته
ستاسو نظر *

تر ټولو ډېر لیدل شوي