قطر کې د طالبانو د دفتر ویاند سهیل شاهین وايي، طالبانو په غور ولایت کې د افغان حکومت ۱۷ نور زندانیان هم خوشي کړي دي.
د
جمهور خبري آژانس د خبر له مخې د شاهین په وینا دغه زندانیان پرون جمعه د چنګاښ ۲۰ مه خوشي شوي او ورسره کور ته د تګ مرسته هم شوې ده.
د طالبانو له خوا دغه شمېر زندانیان پر داسې مهال خوشي کېږي، چې لا هم د طالبانو او حکومت تر منځ د زندانیانو د خلاصون ستونزه نه ده حل شوې.
افغان حکومت وايي، ۵ زره طالب زندانیانو کې ۶ سوه هغه کسان دي، چې حق العبدي مسایل لري، یا هم بهرني جنګیالي دي او یا هم په نړیوال تور لېست کې دي.
حکومت ویلي، دوی د دغه زندانیانو پر ځای نور طالبان زندانیان خوشي کوي، خو طالبان ټینګار کوي چې د ورکړل شوي لېست له مخې باید زندانیان خوشي شي.
طالبانو دا هم ویلي، تر چې د زندانیانو پروسه بشپړه شوې نه وي، دوی بین الاافغاني خبرو ته چمتو نه دي.
خو افغان حکومت بیا وايي، طالبان د تاوتریخوالي پر زیاتولو سره د سولې پر وړاندې خنډ رامنځ ته کوي، او هیله دا ده، چې طالبان تاوتریخوالی راکم، بشردوستانه اوربند او بین الافغاني خبرو ته چمتو شي.
جمهورخبري آژانس:کابل