د ولسي جرګې د غړي الله ګل مجاهد اړوند کسانو له کور نه وسلې نیول شوې

د ولسشمر لومړی مرستیال امرالله صالح وایي، ولسي جرګه کې د کابل د خلکو استازي الله ګل مجاهد د هغه کسانو د خلاصون هڅه کوي، چې له کور نه یې وسلې او مهمات نیول شوي دي.

د جمهور خبري آژانس د خبر له مخې ښاغلي صالح دغه څرګندونې نن چهارشنبې د لړم ۲۱ مه د سهار د شپږنیمو له ناستې وروسته په خپله فسبوک پاڼه کړې دي.

نوموړي لیکلي، د کابل ښار د ۱۲ مې حوزې امر چې یو غیرتي ځوان او انګېزه لرونکی کس دی خبر تر لاسه کوي، چې په یوه کور کې په زیاته اندازه وسلې او مهمات شتون لري.

د ښاغلی صالح په وینا د حوزې امر هم د امنیه قوماندانۍ د ځینو نورو برخو په نسبي ملاتړ په دغه کور عملیات کوي، چې په ترڅ کې یې ګڼ شمېر وسلې او ثانیه سوز تر لاسه کېږي.

نوموړي زیاته کړې، چې په دغه عملیاتو کې د وسلو په تړاو دوه تنه هم نیول شوي او د کور څېښتن په تېښته بریالی شوی دی، خکه حوزې فکر نه کاوه، چې موضوع به دومره پېچلې وي.

د ولسشمر لومړی مرستیال وايي، له عملیاتو او دوه نفرو له نیولو وروسته په ولسي جرګه کې د کابل د خلکو استازی الله ګل مجاهد د حوزې امر ته زنګ وهلی، چې دغه دوه کسان خوشي کړي.

ښاغلي صالح لیکلي«د وسلو تر لاسه کولو او دوه نفرو له نیولو وروسته په ولسي جرګه کې د کابل د خلکو استازی الله ګل خان د حوزې امر ته تلېفون کړی او ورته ویلي یې دي، چې دغه دوه نیول شوي کسان بېرته خوشي کړي، ځکه زما نفر دي او ترهګر نه دي.»

نوموړی وايي، الله ګل مجاهد د حوزې امر ته دا ګواښ هم کړی، چې که دغه نفر خوشي نه کړي، نو سبا ته په حوزه کې د پاتې کېدو او محکمې ته د نه ورتګ لپاره د ده دروازې ته نه ورځي.

ښاغلي صالح زیاته کړې«الله ګل مجاهد د حوزې امر ته ویلي، که د دغه دوه نفره خوشي نه کړل، نو سباته په حوزه کې د پاتې کېدو او محکمې ته د نه ورتګ لپاره زما په دروازه کې ونه دېږي، چې خامخا به درېږې، خو معلومه نه ده، چې له وسلو سربېره له دغه کسانو سره ثانیه سوز څه اړتیا وه.»

د ولسشمر لومړی مرستیال وایي، د حوزې امر ته یې ویلي، چې نور د دغه وکیل تلېفون ته ځواب ورنه کړي او دا موضوع څارنوالۍ ته ولېږي.
 
جمهورخبري آژانس:کابل