د طالبانو د استخباراتو مشر په تخار کې یو ځايي سوداګر وواژه

تخار کې ځايي سرچینې وايي، په دغه ولایت کې د طالبانو د استخباراتو مسوول کسانو د سرو زرو یو سوداګر د پیسو د نه ورکولو له امله په ډزو وژلی دی.

د سرچينې د معلوماتو له مخې، دغه سوداګر شاولي نومېده او د طالبانو د استخباراتو مشر قاري محمد نبي عابد ته د سرو زرو د پېر او پلور د پيسو د نه ورکړې له امله په ډزو وژل شوى دى.

سرچينې زياته کړې، چې دغه سيمه ييز سوداګر شاوخوا شل ورځې وړاندې په تالقانو ښار کې د طالبانو د استخباراتو د مشر کسانو په مرمۍ وواژه.

ویل شوي، چې د طالبانو د استخباراتو مشر له دغې سیمه ییزې شبکې ۳ میلیونه افغانۍ غوښتې وې.

په ورته وخت کې، طالبان د درنو مالیاتو سربیره، په انفرادي ډول د کان کیندونکو څخه درنې پیسې هم راټولوي.

جمهورخبري آژانس