اوزبیکستان متعهد به ارائهٔ 266 تُن مواد اولیهٔ کمک‌های اضطراری به زلزله‌زدگان شد
شنبه ۱۵ سنبله ۱۴۰۴ ساعت ۰۹:۰۴
سفارت گروه طالبان در تاشکند اعلام کرده که نخست‌وزیر اوزبیکستان متعهد به ارائهٔ 266 تُن مواد اولیهٔ کمک‌های اضطراری به زلزله‌زدگان کشور شده است.
سفارت گروه طالبان مقیم تاشکند بامداد امروزشنبه(15سنبله) در اعلامیه‌ای گفته که این سفارت به‌منظور غمشریکی با خانواده‌های آسیب‌دیدگان زلزلهٔ اخیر در ولایات شرقی کشور، مراسم اتحاف دعا و تعزیت برگزار نموده است.
عبدالله عارف‌اُف، نخست‌وزیر جمهوری اوزبیکستان با حضور در این مراسم مراتب تسلیت خویش و رئیس جمهور آن کشور را ابراز و در دفتر تعزیت ثبت نمود.
عارف‌اُف ضمن ابراز همدردی با آسیب‌دیدگان، متعهد به ارائهٔ 266 تُن مواد اولیهٔ کمک‌های اضطراری و همچنان همکاری بیشتر با خانواده‌های متضرر در آینده شد.
عبدالغفار بحر، سفیر امارت طالبان مقیم اوزبیکستان پیرامون تلفات ناشی از زلزله معلومات داده و از اشتراک و‌همدردی عارف‌اُف سپاس‌گزاری نموده است.
کد مطلب: 185696
