روسیه د طالبانو مستقیم ملاتړ کوي

د کندوز والي اسدالله عمر خېل وايي، روسیه په کندوز ولایت کې د وسله والو طالبانو مستقیم ملاتړ کوي او هغوی ته وسلې او مهمات ورکوي.
د جمهور آژانس د خبر له مخې سپوږمۍ راډیو د والي له قوله ویلي، چې وسله وال طالبان په دغه ولایت کې پرمختللې وسلې لري او د روسیې له ملاتړه برخمن دي.
اسد الله عمرخیل وايي، نوموړي ویلي اوس الوتکې راځي د طالب وسله والو په سیمو کې کیني او دوی ته مهمات لېږدوي.
نوموړي ویلي، پخوا په دغه ولایت کې طالبان د استخباراتي ادارو لخوا حمایه کېدل خو اوس روسیه هم د دوی مستقیم ملاتړ کوي.
د کندوز والي اسدالله عمر خېل زیاته کړې، چې روسیه د تاجکستان له لارې طالبانو ته اکمالات کوي او په وینا یې د روسیې او طالبانو تر منځ اړیکې شته، چې ښايي ګواښونه زیات کړي.
که څه هم روسیې تر اوسه په دې اړه څه نه دي ویلي، خو وړاندې تر دې څو ځلې د افغانستان له پاره د روسیې ځانګړي استازي ضمیرکابلوف د روسیې او طالبانو تر منځ د اړیکو پخلی کړی دی.
کابلوف دا هم ویلي، طالبان اوس په افغانستان کې د یوې سیاسی جنګي ډلې په توګه مطرح دی او روسیه له دې خاطره ورسره په اړیکه کې دي، چې طالبان هم د هغه چا پر ضد جګړه کوي، چې روسیه په سوریه کې ورسره په جګړه ده.
دا په داسې حال کې ده، چې په افغانستان کې د ناټو ځواکونو عمومي قوماندان جنرال جان نېکولسن هم ویلي، چې روسیه او طالبان سره اړیکې لري.
هغه ویلي، چې د روسيې له خوا په عامه وسله والو طالبانو ته مشروعيت ورکول پر واقعيت ولاړ کار نه دى، بلکې له دې کاره په استفاده غواړي چې د افغان حکومت او ناټو هڅې کمزوري کړي.
جمهورآژانس:کابل