د تقاعد شویو پولیسو ټولنه وايي، له تېرو دوو کلونو راهیسې یې حقوق نه دي ترلاسه کړي او په ناوړه اقتصادي وضعیت کې دي.
د
جمهور خبري آژانس د خبر له مخې د یادې ټولنې رییس شکرالله امانزوی وايي، د متقاعدینو یوازینۍ هیله د دوی حقوق دي او په وینا یې چې له تېرو دوو کلونو راپدېخوا یې نه دي ترلاسه کړي.
متقاعدین وايي د ژمي را رسېدو ته اندېښمن دي او سږ کال د خپلو کورنیو لپاره سون توکي نه شي برابرولی او اړ دي چې په یخنۍ کې شپې او ورځې تېرې کړي.
بل لور ته بیا د مالیې وزارت ویاند احمدولي حقمل ډاډ ورکوي چې د متقاعدینو د حقوقو د ورکړې لپاره جوړ شوی طرزالعمل یې د اسلامي امارت مشرتابه ته د منظوري په موخه لېږلی دی.
نوموړي زیاته کړې، د مشرتابه له تایيد سره سم به د ټولو متقاعدینو حقوق ورکړل شي.
د متقاعدینو د ټولنې د مالوماتو له مخې اوس ټول هېواد کې د ښځینه وو په ګډون ۱۴۹زره متقاعدین شتون لري چې له تېرو دوو کلونو راهیسې یې خپل حقوق نه دي ترلاسه کړي.
جمهورخبري آژانس: کابل