ملا هبت الله منزوي شوی، طالبان له امریکا سره نېغې اړیکې لري

د پاکستان د پارلمان یوه استازي آصف دراني ادعا کړې، چې د طالبانو مشر ملا هبت الله منزوي شوی او طالبان مستقیمآ له امریکا سره اړیکې پالي.
 
دغه پاکستاني استازي ویلي، همدا اوس د نړۍ هېواودونه په ځانګړې توګه امریکا له طالبانو سره په کابل او دوحه کې نېغې اړیکې لري.
 
نوموړي د پاکستان د امنیت د مطالعاتو او پلټنو له مرکز سره په یوه مرکه کې ویلي«همدا اوس په کابل کې ۲۱ سفارتونه او د امریکا په ګډون ۱۶ سفارتونه په دوحه کې له طالبانو سره په اړیکه کې دي، دا نړۍ نه ده، چې له طالبانو سره اړیکې غواړي، بلکې دا ملا هبت الله اخند دی، چې غلی دی او له خلکو سره نه ګوري له هغه پرته نړۍ د طالبانو سره په اړیکه کې ده.»
 
یاد استازي د طالبانو له مشر سره د قطر د لومړي وزیر لیدنې ته په اشارې ویلي، که دا رښتیا وي، نو دا له نړۍ سره د طالبانو د مشرتابه په تعامل کې د بدلون رامنځ ته کېدل ښيي.
 
دغه پاکستاني استازي د طالبانو د نظام د رسمیت پېژندلو په اړه ویلي، دا پرېکړه د ملګرو ملتونو د امنیت شورا د پنځو دایمي غړو په واک کې ده.
 
جمهورخبري آژانس