د بشري حقونو د څار سازمان د دوحې غونډه د افغانستان د ښځو تر څنګ د ودرېدو فرصت بللی دی

د بشري حقونو د څار سازمان د دوحې دریمه غونډه د ښځو تر څنګ د درېدو او د طالبانو د مشروعیت د مخنیوي لپاره یو فرصت بللی.

دغه سازمان نن سه شنبه د جوزا په ۲۲ مه یو راپور خپور کړ او ویې ویل چې "دا [غونډه] یو فرصت دی چې د افغان میرمنو تر څنګ ودریږي او د بشري حقونو د جدي بحران او یا د طالبانو رژیم ته د مشروعیت ورکولو لپاره له هر ډول ممکنه کار څخه ډډه وکړي."

د راپور له مخې، نړیواله ټولنه باید طالبان د ښځو او نجونو په وړاندې د هغوی د «جنایتونو» حساب ورکړي.

راپور زیاته کړې، "نړیواله ټولنه باید هغوی [طالبان] د ملګرو ملتونو په غونډو کې رابللي نه وي. هیڅوک باید د طالبانو د رژیم پر ضد بندیزونه لرې نه کړي."

د بشري حقونو د څار په وینا؛ د نورو محدودیتونو ترڅنګ، ۱۰۰۰ ورځې کېږي چې طالبانو په افغانستان کې له شپږم ټولګي څخه پورته نجونې ښوونځيو ته له ورتګ منع کړي دي.

خو; راپور خبرداری ورکوي چې له طالبانو سره د اړیکو د عادي کېدو خطر به تر بل هر زیان زیات وي.

د راپور له مخې، دا په نړۍ کې د ښځو د حقونو تر ټولو جدي بحران دی، چې د نړیوالو کارپوهانو له خوا د "جنسي توپیر" په توګه غندل شوی دی.

د يادونې وړ ده، چې د افغانستان په چارو کې د هېوادونو د ځانګړيو استازو درېيمه غونډه د سرطان په لسمه او يوولسمه نېټه په دوحه کې د ملګرو ملتونو د سرمنشي په کوربه توب جوړېږي.

د دې غونډې موخه "له افغانستان سره د نړیوالو اړیکو زیاتول په لا همغږي، همغږي او جوړښت کې دي".

جمهورخبري آژانس