ملا برادر د اذربایجان په سفر روان شو

د طالبانو د اقتصادي چارو مرستیال مشر د ایکو په غونډه کې د ګډون لپاره اذربایجان ته تللی دی.

د جمهور خبري آژانس د خبر له مخې د طالبانو د اقتصادي چارو مرستیال د رسنیو دفتر د سې شنبې په ورځ (د چنګاښ ۱۰مه) په یوه اعلامیه کې وویل چې ملا عبدالغني برادر د ایکو په ۱۷مه غونډه کې د ګډون لپاره د یو پلاوي په مشرۍ اذربایجان ته تللی دی.

د دې سفر په جریان کې، د ایکو په ۱۷مه غونډه کې د ګډون او وینا کولو سربیره، تمه کیږي چې ملا برادر به د اذربایجان له یو شمیر چارواکو سره هم وګوري ترڅو په بیلابیلو برخو کې د دوه اړخیزو اړیکو د پراختیا په اړه بحث وکړي.

د ایکو ۱۷مه غونډه به د جولای په دریمه او څلورمه نیټه د اذربایجان په کوربه توب ترسره شي، چې د سازمان د غړو هیوادونو ولسمشران او لوړ پوړي چارواکي به پکې ګډون وکړي.

جمهورخبري آژانس