په غور کې له ۱۲۰ څخه زیاتو اړمنو کورنیو ته د خوراکي توکو ویش

د طالبانو د کورنیو چارو وزارت په غور ولایت کې له ۱۲۰ څخه زیاتو اړمنو کورنیو ته د خوراکي توکو ویش اعلان کړ.

د جمهور خبري آژانس د خبر له مخې د طالبانو د کورنیو چارو وزارت نن یکشنبې (د زمري ۱۲ مه) په یوه اعلامیه کې وویل چې دې ډلې د غور ولایت په مرکز فیروزکوه ښار کې ۱۲۶ اړمنو کورنیو ته خوراکي توکي ویشلي دي.

د طالبانو په اعلامیه کې ویل شوي چې د غور ولایت په مرکز فیروزکوه ښار کې ۱۲۶ اړمنو کورنیو ته د ۹۸۵،۳۲۰ افغانیو په ارزښت خوراکي توکي ویشل شوي دي.

په ویشل شویو خوړو کې اوړه، وريجې، غوړي، نخود او لوبیا شامل دي.

د غور ولایت په مرکز فیروزکوه ښار کې د بې وزلو خلکو د راټولولو کمیسیون لخوا د پیژندلو وروسته، دا خلک مستحق وپیژندل شول او دا توکي ورته وویشل شول.

د یادونې وړ ده چې په افغانستان کې د طالبانو د نږدې څلورو کلونو واکمنۍ سره، له ۲۱ ملیون څخه ډیر افغانان بشري مرستو ته اړتیا لري.

جمهورخبري آژانس