افغان‌های گیرمانده در پاکستان با شناسنامه می‌توانند به کشور شان برگردند

نمایندگی ویژه پاکستان در امور افغانستان اعلام کرده که شهروندان گیرمانده افغانستان در پاکستان می‌توانند تا آخر ماه اپریل با شناسنامه به افغانستان برگردند.

به گزارش خبرگزاری جمهور؛ محمد صادق نماینده ویژه پاکستان برای افغانستان در تویترش نوشته که افغان‌های گیرمانده در پاکستان سر از امروز دوشنبه (5 ثور) تا روز جمعه آینده، می‌توانند با شناسنامه از مرز تورخم به سمت کشور خود شان عبور کنند.

او تاکید کرده که افغان‌های گیرمانده فقط می‌توانند از طریق مرز تورخم پاکستان را ترک کنند.

محمد صادق همچنین تذکر داده است که به طور معمول تنها بیماران اجازه عبور بدون ویزا از گذرگاه تورخم را دارند.

گفتنی است که پیش از این دولت پاکستان، مهاجران افغانی که با شناسنامه می‌خواستند به کشور شان برگردند، اجازه عبور از مرز را نمی‌داد.

خبرگزاری جمهور- کابل