مرزبانان تاجیکستان 7 شهروند افغانستان را کشتند

منابع آگاه در ولایت تخار می‌گویند که مرزبانان تاجیکستان 7 شهروند افغانستان که وارد خاک این کشور شده بودند را کشته‌اند.

به گفته منابع، این افراد شب چهارشنبه 21 حمل، از قریه مرزی "نوآباد" ولسوالی چاه آب ولایت تخار وارد خاک تاجیکستان شده بودند که با گلوله باری نیروهای مرزی آن کشور مواجه شده‌اند.

گفته شده که این افراد به ظن قاچاق مواد مخدر گلوله باری شده؛ اما تا هنوز مشخص نیست که آیا آنان به راستی مواد مخدر انتقال می‌کردند یا خیر! منابع گفته که این افراد باشندگان تخار و بدخشان هستند و اجساد آنان روز گذشته به باشندگان تخار سپرده شده‌اند.

گفتنی است که ولایت تخار از طریق ولسوالی‌های درقد، دشت قلعه، خواجه‌ بهاوالدین، چاه‌آب و خواجه‌غار با تاجیکستان هم مرز است.

این در حالی است که پیش از این تاجیکستان از افزایش قاچاق مواد مخدر از افغانستان ابراز نگرانی کرده ‎است.

خبرگزاری جمهور