جنرال باجوه: په غزني کې وژل شوي پاکستانیان ترهګر نه دي

په داسې حال کې، چې خپله پاکستاني رسنیو د غزني په جګړه کې د نورو څه ان د پاکستاني جنرالانو د وژل کېدو پخلی کړی، خو د پاکستان د پوځ مشر وايي، په دغه جګړه کې وژل شوي پاکستانیان ترهګر نه بلکې مزدورکاران دي.

د جمهور خبري آژانس د خبر له مخې جنرال قمر جاوید باجوه د افغان چارواکو د دغه خبرو په غبرګون کې چې د غزني په جګړه کې پاکستاني جګړه مارو برخه اخیستې وه ویلي، له افغانستانه، پاکستان ته راوړو جسدونو او ټپیانو ته دې د ترهګرو خطاب نه کېږي.

د پاکستان د پوځ مشر ویلي ګڼ پاکستانیان په افغانستان کې په کار او مزدورۍ بوخت دي، نو ځکه په بریدونو کې مرګ ژوبله ورته اوړي.

جنرال باجوه ویلي،  پاکستان په افغانستان کې د هېڅ ډول ترهګریزو فعالیتونو ملاتړ نه کوي، او افغان حکومت ته نه ده په کار چې پاکستان له ترهګرۍ په ملاتړ تورن کړي.

نوموړي تایید کړې، چې په وروستیو پېښو کې هم پاکستانیان ټپیان شوي یا وژل شوي دي چې دوی ته د ترهګرو خطاب کول د تاسف وړ خبره ده.

باجوه دغه څرګندونې پر داسې مهال کوي، چې خپله پاکستاني رسنیو تایید کړې او انځورونه او ویډیوګانې یې خپرې کړې، چې د غزني په جګړه کې د نورو پاکستاني وسله والو تر څنګ ان د دغه هېواد د پوځ او استخباراتو جنرلانو ته هم مرګ ژوبله اوښتې او مړي او ټپیان یې پاکستان ته وړل شوي دي.

جنرال شاهد عزیز یو له هغه پاکستاني جنرالانو دی، چې د پاکستاني رسنیو د راپور له مخې د افغانستان د غزنی ولایت په جګړه کې وژل شوی دی.

دغه راز په پاکستان کې د عوامي نېشنل ګوند مشر افراسیاب خټک هم په یوه ټوېټر کې تایید کړې، چې د غزني په جګړه کې ګڼ وژل شوي او ټپي جګړه مار پاکستان ته راوړل شوي، چې په وینا یې د پاکستان حکومت باید په دې اړه وضاحت ورکړي.

دغه راز افغان ولسمشر محمد اشرف غني هم په غزني ولایت کې د وینا پر مهال په جګړه کې د پاکستاني جګړه مارو د شتون خبر تایید کړ.

نوموړي و ویل، چې د پاکستان د پوځ مشر جنرال باجوه او نوی لومړی وزیر عمران خان باید د غزني په جګړه کې د پاکستاني جګړه مارو د شتون او په پاکستان کې د طالب ټپیانو د درملنې په اړه وضاحت ورکړي.

له دې سره د افغانستان د ملي امنیت لوړ پوړي چارواکي وايي، د غزني جګړه دوه میاشتې وړاندې په پاکستان کې پلان او د دغه هېواد استخباراتي ادارې آی اس آی دغه جګړه څلورو جبهو ته سپارلې وه.

سرخط ورځپاڼې ته د افغانستان د ملي امنیت یوې باوري سرچینې ویلي، د يوې جبهې مشري زبير بن العوام کوله، د دهمې جبهې مشري خالد بن ولید کوله، درېیمې جبهې مشري د عمر الخطاب په مستعار نوم طالب قوماندان کوله او څلورمه جبهه هم د المنصور په نوم وه، چې په حقاني شبکې پورې اړه لري.
د سرچینې د معلوماتو پر اساس د زبیر بن العوام په مشرۍ جبهه کې ۱۲۰ جګړه مار و، چې تر نيمايي‌ زيات یې د پاکستان د پنجاب ايالت د ګوجرانواله او کم يې د خيرپښتونخوا اوسېدونکي وو.

ورځپاڼې وړاندې لیکلي د خالد بن ولید په نوم جبهه کې ۹۰ کسه جګړه مار و، چې مشر یې د پاکستان د اېبټ آباد سیمې اوسېدونکی او جګړه مار یې ټول د لښکر طیبه وسله والې ډلې غړي وو.

سرچینه زیاتوي د عمر بن الخطاب په مستعار نامه د طالب قوماندان په جبهه کې بیا ۷۷ کسان و، چې زیاتره یې په خټک قوم پورې اړه درلوده او نور په کې د زرمت، او کندهار جنګیالي هم وو.

د المنصور جبهه چې په حقاني شبکې پورې یې اړه درلوده ۱۲۰ جګړه مار یې درلودل، چې ډېری یې د پکتیا، پکتیکا، غزني، زابل او جنوبي وزیرستان اوسېدونکي وو.

جمهورخبري آژانس:کابل