پاکستان له ۱۳۵ ورځو او ۲۷ میلیون ډالرو تاوان اړولو وروسته خپل هوايي حریم کې افغان پروازونو ته اجازه ورکړه، چې له خاورې یې هند ته تېر شي.
د
جمهور خبري آژانس د خبر له مخې د هند او پاکستان تر منځ کړکېچ وروسته پاکستان خپل فضايي حریم د افغان الوتکو پر مخ وتاړه.
پاکستان ۱۳۵ ورځې خپل فضايي حریم د افغان الوتکو پر مخ تړلی و او دغه کار یې افغانستان ته ۲۷ میلیونه ډالر اقتصادي زیان واړاوه.
خو د افغان حکومت د پرله پسې هڅو وروسته پاکستان خپل هوايي حریم د افغانستان د الوتکو پر مخ خلاص کړ او اجازه یې ورکړه، چې د دوی له لارې هند ته تېرې شي.
د ملکي هوايي چلند ادارې او د ملي امنیت شورا د اخذ او همغږۍ ریاست پر خپله رسمي فیسبوک او ټوېټر پاڼو د دغه خبر تایید کړی ویلي یې دي، چې پاکستان له ۱۳۵ ورځو وروسته ټولو ملکي پروازونو ته اجازه ورکړي چې ددوی له فضا استفاده وکړي.
د هوايي چلند ادارې په وینا د پاکستان له فضا پر پروازونو تېرو بندیزونو افغان هوايي شرکتونو ته او مسافرو ته ګڼ زیانونه اړولي وو.
دغه ادارې د یادې فضا د پرانیستل کېدو برخه کې د افغان دولت له هڅو هم مننه کړې ده.
د ملي امنیت شورا د اخذ او همغږۍ ریاست وايي، له دې وروسته به کابل- ډیلي ته د یوې الوتنې بیه بیرته یوسلو شپېته ډالرو پورې راښکته شي په داسې حال کې چې کله د پاکستان هوايي حریم تړلی و، نو د ایران له لارې کابل نه نوي ډيلي ته د یوې الوتنې د ټکټ بیه ۳۰۰ نه تر ۳۵۰ ډالرو ختلې وه.
جمهورخبري آژانس:کابل