د کابل د کلکان لپاره طالب ولسوال ملي امنیت نیولی دی

د ملي امنیت لوی ریاست وایي، ځانګړو ځواکونو د کابل ولایت د کلکان ولسوالۍ لپاره د طالبانو نومول شوی ولسوال نیولی دی.

د جمهور خبري آژانس د خبر له مخې دغه ریاست نن دوشنبې د وږي ۲۵ مه خپره کړې خبرپاڼه کې ویل شوي دغه ولسوال سردار محمد نومېږي او د کابل ښار د اتمې ناحیې اړوند سیمه کې ونیول شو.

په خبرپاڼه کې ویل شوي، په عملیاتو کې د سردار محمد مشهور په ملا سردار تر څنګ د طالبانو درې نور برجسته غړي هم نیول شوي دي.

ملي امنیت ریاست وايي، نیول شویو کسانو، کابل کې په ترهګرو فعالیتونو، په بګرام هوايي ډګر راکټي بریدونو، لارې شکونو، د خلکو ځورولو او له خلکو په زور د جزیې اخستلو کې لاس درلود، چې د ملي امنیت د ځانګړو ځواکونو له خوا ونیول شول.

خبرپانه کې دا هم ویل شوی، چې ملا سردار له څو کلونو راهیسې د کابل د میربچه کوټ ولسوالۍ لپاره هم د طالبانو د ولسوال دنده تر سره کړې.

سرچینه زیاتوي، چې هغه په دې وروستیو کې د طالبانو د پېښو شورا ورغوښتی و او د هغوی په لار ښوونه د کابل ولایت د کلکان لپاره ولسوال ټاکل شوی وو.

طالبانو تر اوسه په دې اړه څه نه دي ویلي.

جمهورخبري آژانس:کابل