ډاکتر عبدالله عبدالله او مایک پمپیو تلېفوني خبرې کړې دي

د افغان حکومت اجرائیه رییس او د ثبات او همپالنې ټاکنیز ټیم مشر ډاکتر عبدالله عبدالله د امریکا له بهرنیو چارو وزیر مایک پمپیو سره تلېفوني خبرې کړې دي.

د جمهور خبري آژانس د خبر له مخې ښاغلي عبدالله په خپله فسبوک پاڼه لیکلي، چې له ښاغلي پمپیو سره یې پرون (دوشنبې د لیندۍ ۱۱مه) ماخوستن مهال تلېفوني خبرې کړې  دي.

نوموړي زیاته کړې، چې په دغه تلېفوني اړیکه کې  دواړو لورو افغانستان د ولسمشر ټرمپ پر سفر، سولې او د افغانستان اړوند مسایلو او د ولسمشرۍ ټاکنو په اړه خبرې اترې کړي دي.

عبدالله د خبرو نور جزیات نه دي ورکړي، خو دا تلېفوني خبرې وروسته له هغې  کېږي، چې د ولسمشر لومړي مرستیال او د ثبات او همپالنې ټيم یو بل مهم غړي جنرال عبدالرشید دوستم پرون په شبرغان کې د بهرنیو ځواکونو له عمومي قوماندان جنرال سکاټ مېلر او د افغانستان د ملي دفاع سرپرست وزیر اسدالله خالد سره وکتل او د ټاکنو تر څنګ یې پر یو لړنورو مسایلو خبرې وکړې.

ویل کېږي سکاټ مېلر جنرال دوستم ته د ناټو عالي مډال ورکړ.

تر دغه لیدنې وروسته ښاغلي دوستم په خپلو خبرو کې ویلي، چې د ټاکنو خپلواک کمېسیون نور باید د خلکو انتظار پای ته ورسوي او د ټاکنو لومړنۍ پایلې د اعلان کړي.

جمهورخبري آژانس:کابل