د ننګرهار سیمه ییز چارواکي وایي، پاکستان د تورخم دروازه د هر ډول تګ راتګ په مخ وتړله.
د
جمهور خبري آژانس د خبر له مخې د ننګرهار د والي ویاند عطاالله خوږیاڼی د دغه خبر د پخلي تر څنګ وایي، پاکستان نن دوشنبې د کب ۲۶ مه دغه دروازه د هر ډول تګ راتګ په مخه وتړله.
نوموړي زیاته کړه، چې پر دروازه ولاړ پاکستاني ځواکونه هېچا ته د تګ راتګ اجازه نه ورکوي.
د یادونې ده، چې پاکستان څو ورځې وړاندې خبر ورکړی و، چې د کرونا ویروس د مخینوي په موخه به سر له دوشنبې افغانستان او ایران سره ټولې دروازې وتړي.
د تورخم دروازې تر تړل کېدو مخکې پاکستان د روانې مارچ میاشتې پر لومړۍ نېټه په کندهار کې د چمن - سپین بولدک لار هم د هر ډول تګ راتګ پر مخ وتړله.
دغه هیواد همدارنګه د کرونا ویروس د انتقال د مخنیوي په هدف په هرات کې د خپلې قونسلګرۍ د وېزې ورکولو څانګه هم د ۱۵ ورځو لپاره تړلې ده.
تر دې مخکې د منځنۍ اسیا درې هیوادونو ازبکستان، تاجکستان او ترکمنستان هم د کرونا ویروس د انتقال د مخنیوي په هدف له افغانستان سره خپل د تګ راتګ پولې بندي کړي دي.
خو د افغانستان د سوداګرۍ خونې مسؤلین وايي د دې سره سره چې له ترکمنستان سره تګ راتګ بند شوی، سوداګریزه راکړه ورکړه لا روانه ده.
دا په داسې حال کې ده چې په افغانستان کې د کرونا مثبتو پېښو شمېر ۲۱ ته ورسېد چې د روغتیايي چارواکو په وینا ټول یې له ایران څخه دغه هیواد ته داخل شوي دي.
جمهورخبري آژانس:کابل