افغان ولسمشر محمد اشرف غني د بهرنیو ځواکونو وتل د افغانستان لپاره نه بلکې، د امریکا لپاره د اندېښنې وړ مسله بللې ده.
د
جمهور خبري آژانس د خبر له مخې ښاغلي غني د د TED په نوم له یو امریکايي بنسټ سره په انلاین مرکه کې ویلي، امریکا باید په دې اړه اندېښمنه واوسي چې له افغانستان څخه یې د سرتیرو ایستل د هغوی د هېواد لپاره څه پایلې درلودلی شي.
ښاغلي غني زیاته کړې، که څه هم اوس افغان ځانګړي ځواکونه د سیمې په کچه په دویم ځای کې دي، هوايي ځواکونه هم درې برابره شوي او دا ځواکونه اوس د امنیت ساتنې بشپړه وړتیا لري.
خو خبرداری یې ورکړ چې له ټاکلې مودې وړاندې او د افغان حکومت او طالبانو ترمنځ د سولې له تړون مخکې له افغانستان څخه د ټولو امریکايي ځواکونو وتل به د سولې پروسه اغیزمنه کړي.
ولسمشر غني په دغه مرکه کې د سولې او افغانستان د اوسني و ضعیت په اړه هم څرګندونې کړې ویلي، یې دي، که څه هم د پراخ تاوتریخوالي کچه په افغانستان کې کمه شوې ده خو لا هم د طالبانو د تاوتریخوالي له امله د مرګژوبلې کچه خورا لوړه ده.
نوموړي زیاته کړې« پراخې جګړې کمې شوې خو بیا هم هره ورځ د افغان نظامیانو د مړینې کچه په منځني ډول ۳۰ تر ۳۵ او د ټپیانو شمېر ۷۰ ته رسېږي.»
هغه وايي، طالبان د افغانستان د ټولنې یوه برخه ده او دا ډله هم باید ومني چې د افغانانو له غوښتنې پرته هېڅ نشي کولی او یوې سیاسي حل لارې ته اړتیا ده.
ښاغلي غني ټینګار کړي، چې د افغانستان وضعیت ته په پاملرنې له طالبانو سره د سولې د خبرو لپاره زمینه برابرېدلی شي او دا به افغانستان د افغانانو په مالکیت د سولې مذاکراتو په لور بوځي.
افغان ولسمشر زیاته کړې، چې د طالب بندیانو او حکومتي بندیانو د خوشې کولو بهیر دوام لري او د سولې د مخامخ خبرو د ژر پیلېدو هیله یې ښودلې ده.
جمهورخبري آژانس:کابل