تجهیزات و وسایط روسی به منظور تقویت امنیت مرزی بین تاجیکستان و افغانستان مستقر شده است.
به گزارش
خبرگزاری جمهور؛ دولت روسیه دیروز شنبه 11 سپتمبر (20 سبنله) وسایط زرهی و تجهیزات نظامی خود را به تاجیکستان فرستاد تا در مرز با افغانستان مستقر شود.
روسیه گفته که این تدابیر به منظور تقویت امنیت مرزهای جنوبی این کشور اتخاذ شده است.
پس از خروج نیروهای امریکایی و تصرف افغانستان توسط طالبان، مسکو در تاجیکستان تمرینات نظامی را راه اندازی کرده و پایگاههای نظامی خویش را تقویت کرد.
روسیه از سرازیر شدن احتمالی تندروان اسلامی به کشورهای آسیای مرکزی نگران بوده و در پی ایجاد سپر دفاعی در جنوب تاجیکستان است.
یوفژینی تسندیاکین، جنرال روسی در یک اعلامیهٔ وزارت دفاع این کشور گفته است که علیه بیثباتی در حال رشد در نزدیکی مرز جنوبی تاجیکستان و برای امنیت تاجیکستان و روسیه، مسکو با دوشنبه یکجا کار میکند.
انتقال وسایل نظامی که تجهیزات محاربهٔ نزدیک و وسایل محافظتی نیز در آن شامل است، قابلیتهای نظامی تاجیکستان را به گونهٔ چشمگیر تقویت کرده و عصری میسازد.
تاجیکستان در حدود 1344 کیلومتر مرز مشترک با افغانستان دارد که کوهستانی بودن آن کنترول آن را دشوار میسازد.
خبرگزاری جمهور- کابل