طالب ډلې په جوزجان کې د ۳۰۰ میګاواټه ګازي برېښنا د تولید خبره کړې ده

د طالبانو د ډلې اقتصادي کمیسیون اعلان کړی چې دغې ډلې په جوزجان ولایت کې د سروبي د دویم بند د جوړولو او د ۳۰۰ میګاواټه ګازو د بریښنا د تولید په اړه خبرې وکړې.

د طالبانو د اقتصادي مرستیال ملا عبدالغني مطبوعاتي دفتر د پنجشنبې په ورځ (د غبرګولي ۲۴ مه) په یوه خبرپاڼه کې ویلي چې د دې ډلې اقتصادي کمېسیون په جوزجان کې د سروبي د دویم بند د جوړولو او د ۳۰۰ میګاواټه ګازي برېښنا د تولید په اړه خبرې وکړې.

 طالبانو ویلي چې د دې ډلې د اقتصادي کمیسیون په غونډه کې د کابل ولایت د سروبي د دویمې برخې د جوړولو، په جوزجان ولایت کې د ۳۰۰ میګاواټه ګازي برېښنا د تولید په اړه د کانونو او پټرولیم وزارت له خوا د چمتو شوې طرحې په اړه خبرې وشوې. د ساختماني موادو او یو شمېر نورو اقتصادي مسایلو په اړه بحث او خبرې وشوې.

طالبانو زیاته کړې، چې په دې غونډه کې د اوبو او انرژۍ وزارت ته دنده وسپارل شوه، چې د سروبي د دویم بند د جوړولو په اړه د اقتصادي کمېسیون نظر په پام کې نیولو سره له بېلابېلو شرکتونو سره تخنیکي خبرې وکړي او خپل راپور اقتصادي کمیسیون ته وړاندې کړي.

په اعلامیه کې راغلي چې د اوبو او انرژۍ وزارت ته امر شوی چې په جوزجان ولایت کې د ۳۰۰ میګاواټه ګازي برېښنا د تولید په اړه د کانونو او پټرولیم وزارت په ګډون د پلان له وړاندې کوونکي شرکت سره تخنیکي خبرې وکړي او خپل راپور دې کمېسیون ته وړاندې کړي. اقتصادي کمیسیون.

جمهورخبري آژانس