د پاکستاني پوځ سره په سرحدي نښته کې د تحریک طالبان پاکستان ۴۷ وسله وال ووژل شول

د پاکستان پوځ اعلان وکړ چې د افغانستان پولې ته نږدې د هیواد د امنیتي ځواکونو او پاکستاني طالبانو جنګیالیو ترمنځ په روانو نښتو کې ۱۴ نور وسله وال ووژل شول.

دغه عملیات د بلوچستان ولایت په ژوب ولسوالۍ کې  روان دي، او په دوو ورځو کې د پاکستاني طالبانو تلفات ۴۷ ته رسیدلي دي.

د جمهور  اژانس د خبر له مخې، د پاکستان پوځ په یوه مطبوعاتي اعلامیه کې اعلان وکړ چې د هیواد امنیتي ځواکونو د بلوچستان ولایت په ژوب ولسوالۍ کې په دوو ورځو عملیاتو کې د وسله والو پورې اړوند د پام وړ وسلې، مهمات او چاودیدونکي توکي نیولي دي.

په دې مطبوعاتي اعلامیه کې، وسله والو ته "د هند ملاتړ شوي خوارج" ویل شوي دي.

د پاکستان امنیتي چارواکو د جمعې په ورځ راپور ورکړ چې د تحریک طالبان پاکستان (TTP) ۳۳ غړي چې هڅه یې کوله د افغانستان له پولې څخه د پاکستان خاورې ته ننوځي، په بلوچستان ولایت کې په یوه عملیاتو کې ووژل شول.

د پاکستان پوځ اعلان وکړ چې په سیمه کې د تصفیې عملیات لاهم روان دي.

په نښتو کې د وژل شویو پاکستاني امنیتي ځواکونو د شمېر په اړه رسمي ارقام نه دي خپاره شوي.

پاکستاني چارواکو په وار وار پر افغان طالبانو تور لګولی چې د تحریک طالبان پاکستان (ټي ټي پي) غړو ته یې پناه ورکړې، دا تور افغان طالبانو په دوامداره توګه رد کړی دی.

دا نښتې په داسې حال کې رامنځته کیږي چې په وروستیو میاشتو کې د پاکستان او افغانستان ترمنځ سرحدي تاوتریخوالی زیات شوی دی.

شنونکي وايي چې په سرحدي سیمو کې د ټي ټي پي په څیر د وسله والو ډلو دوامداره شتون د دواړو هیوادونو لپاره لوی امنیتي ننګونې رامینځته کوي.

جمهورخبري آژانس