سیمه ییز چارواکي وایي، ننګرهار ولایت کې په یوه نوي رغېدونکي ښوونځي کې ماین چاودنه شوې، چې له امله یې ۷ تنو ته مرګ ژوبله اوښتې ده.
د جمهور آزانس د خبر له مخې دغه چاودنه نن دوشنبې د لړم ۶ مه سهار شاوخوا لس بجې د ننګرهار ولایت د کوټ ولسوالۍ په مترانو سیمه کې رامنځ ته شوې ده.
د والي ویاند عطاالله خوږیاڼی وايي، چاودنه په یوه نوې رغېدونکي ښوونځي کې د اېښودل شوي ماین له امله رامنځ ته شوې ده.
د هغه په وینا په چاودنه کې دوه تنه وژل شوي او پنځه نور ټپیان شوي او ټول هغه کسان دي، چې په یاد ښوونځي کې یې مزدوري کوله.
تر اوسه د چاونې مسوولیت چا نه دي اخیستی.
جمهور خبري آژانس:ننګرهار