په قطر کې د طالبانو د دفتر ویاند سهیل شاهین په تازه څرګندونو کې ویلي، چې د سولې هوکړه د راتلونکې شنبې په ورځ لاسلیک کېږي او په دې برخه کې هېڅ بدلون نه دی راغلی.
د
جمهور خبري آژانس د خبر له مخې شاهین ویلي د هوکړې له لاسلیک وروسته به افغان حکومت د طالبانو پنځه زره او طالبان به د حکومت زر کسه بندیان خوشي کوي.
د هغه په وینا دغه کار د بین الاافغاني خبرو لپاره د باور رامنځ ته کولو په موخه کېږي او له هغې وروسته به بین الاافغاني خبرې هم پیلېږي.
شاهین دا هم ویلي، چې د سولې هوکړه به قطر کې لاسلیک شي او په دې اړه جوړو شویو مراسمو ته د ۲۷ هېوادونو استازي وربلل شوي دي.
د امریکا له لوري تر اوسه دا نه دي ویل شوي، چې د سولې تړون به کوم چارواکي لاسلیکوي، خو طالبانو ویلي د دوی له لوري ملا عبدالغني برارد ورته ټاکل شوی دی.
د یادونې ده، چې وړمه ورځ د افغانستان لپاره د روسیې ځانګړي استازي ضمیر کابلوف او د پاکستان د بهرنیو چارو وزیر شاه محمود قریشي هم ویلي و، چې دوی ته په دغه مراسمو کې د ګډون بلنه ورکړل شوې او ډېر ژر به ورشي.
جمهورخبري آژانس:کابل