پوتین: می‌خواهم تمام اقوام افغانستان در حاکمیت کشور خود سهیم شوند

ولادیمیر پوتین رییس جمهور روسیه در جریان دیدارش از تاجیکستان گفته که کشورش بالای روابط با طالبان کار می‌کند.

به گزارش خبرگزاری جمهور؛ پوتین که دیروز سه شنبه (7 سرطان) در یک سفر کاری وارد دوشنبه پایتخت تاجیکستان شد، گفته که برای تقویت روابط با طالبان کار می‌کند و می‌خواهد که تمام اقوام افغانستان در حاکمیت کشور سهم داشته باشند.

پوتین تاکید کرد که روسیه برای عادی شدن وضعیت در افغانستان تلاش دارد.

در اعلامیه کاخ کرملین به نقل از پوتین آمده: "ما از هیچ تلاشی برای عادی کردن وضعیت [در افغانستان] دریغ نکرده ایم. ما تلاش داریم تا روابط خود را با نیروهای سیاسی که کنترول اوضاع را در افغانستان در دست دارند، تقویت کنیم."

رییس جمهور روسیه توضیح داد که بخشی از این تلاش‌ها معطوف به مشارکت نمایندگان اقوام در حکومت افغانستان است.

این در حالی است که روسیه و تاجیکستان به شدت نگران امنیت مرزهای کشورهای آسیای میانه با افغانستان اند.

پس از تسلط طالبان بر افغانستان، مسکو بزرگترین پایگاه نظامی خود را در تاجیکستان بیشتر تقویت کرده است.

گفتنی است که در ده ماه گذشته تاجیکستان، اوزبیکستان و ترکمنستان چندین بار از خاک افغانستان تهدید شده اند.

خبرگزاری جمهور- کابل