په افغانستان جنګېدونکې داعش ډله په اسلام اباد کې رامنځته شوې ده

د

پخواني ولسمشر حامد کرزي ویاند ایمل فیضي وايي په افغانستان کې د داعش تر نامه لاندې جګېدونکې ډله په اسلام اباد کې رامنځته شوې ده.
د جمهور آژآنس د خبر له مخې فیضي دغه څرګندونې په یوه لیکنه کې چې بي بي سي خپره کړې ویلي دي.
نوموړي په لیکنه کې ویلي، چې پاکستان له دې لارې غواړي د منځۍ اسیا هېوادونو ته چې د انرژۍ لویې زېرمې لري ځان ورسوي.
د پخواني ولسمشر ویاند په لیکنه کې زیاته کړې، چې اسلام اباد په تېرو کلونو کې څو ځلې د افغانستان د پخواني حکومت له رهبرۍ غوښتي وو چې پاکستان ته د افغانستان له خاورې تاجکستان ته لاره ورکړي.
خو ولسمشر کرزي هېڅکله دا ورسره ونه منله، ځکه د نورو ملحوظاتو تر څنګ، هغه په دې کار کې د سیمې ناآرامي او بې ثباتي لیداه.
فیضي وايي پاکستان په خپل بهرني سیاست کې د افراطي ډلو له کارولو څخه لاس اخیستونکى نه دی.
نوموړي ویلي، چې د پاکستان مهم نظامي بنسټونه له ځانګرو افراطي ډلو سره ستراتیژیک اتحاد لري او د دغو افراطي ډلو په واسته خپل تروریستی عملیات تر سره کوي او لا هم په افغانستان کې د جنګ اور بل ساتي.
فیضي دا خبرې پر داسې مهال کړې، چې پخواني ولسمشر حامد کرزي هم له بي بي سي سره په مرکه کې ویلي، چې په افغانستان کې د داعش راپیدا کېدل یوه بهرنۍ استخباراتي دسیسه ده.
نوموړي ویلي که د افغانستان په هره سیمه کې څوک د داعش بیرغ پورته کړي ولس دې پوه شي، چې دا یوه بهرنۍ دسیسه ده او غواړي افغانستان په نویو طرحو او طریقو بې ثباته کړي.
ښاغلي کرزي دا هم ویلي چې د افغانانو تر څنګ د پاکستان امنیتي ځواکونه هم باید دې توطیې ته جدي متوجه اوسي ځکه چې په وینا یې دېرش کاله وړاندې هم د پاکستان دغه ارګانونه د سیمې له یو شمېر نورو هېوادونو سره یوه معامله تر سره کړه، چې هم یې خپل ځان خراب کړ او هم موږ، خو دا ځل باید دا تېروتنه تکرار نه شي.
پخواني ولسمشر کرزي دا هم ویلي، چې د افغانستان په اړه د پاکستان په تګلاره کې کوم بدلون تر اوسه نه دی لیدلی خو په وینا یې تمه لري، چې بدلون به په کې راشي ځکه په وینا یې هغوی هم انسانان دي او پر دې پوهېږي، چې د پاکستان غلطو پالیسو د دې هېواد وګړو ته سخت زیانونه اړولي دي.
جمهور آژآنس: کابل