مجاهد: د رسنیو د ستونزو د حل لپاره وروستۍ هڅې کوو

د افغان حکومت مرکزي ویاند ذبیح الله مجاهد وايي، د رسنیو د ستونزو د حل لپاره خپلې وروستۍ هڅې کوي.

د جمهور خبري آژانس د خبر له مخې ښاغلي مجاهد دغه څرګندونې له رسنیو سره د اطلاعاتو او کلتور وزارت په مشورتي ناسته کې  کړې او ویلي یې دي، په هېواد کې د رسنیو پیاوړتیا د اسلامي امارت پالیسي ده.

په دغې ناسته کې د اطلاعاتو او رسنیو په برخه کې پر بېلابېلو مسایلو خبرې شوې دي.

د اطلاعاتو او کلتور وزارت مسوولینو هم په دې غونډه کې له رسنیو سره پر همکارۍ ټینګار وکړ.

د دغه وزارت سرپرست ملا خیرالله خیرخوا له ټولو رسنیو غوښتي چې، اسلامي ارزښتونو ته په پام سره حقاق بیان کړي.

په دې غونډه کې د رسنیو ځینو استازو هم د خپلو رسنیزو چارو پر وړاندې خپلې ستونزې په ډاګه کړې چې د سرپرست حکومت چارواکو د دغو ستونزو د حل ډاډ ورکړ.

د اطلاعاتو او کلتور وزارت وايي، هڅې کوي چې، د رسنیو د ستونزو د حل لپاره د رسنیو له مسوولینو سره د ورته غونډو په شمېر کې ډېروالی راولي.

جمهورخبري آژانس:کابل