د طالبانو تر واکمنۍ لاندې افغانستان د نړۍ له بې وزلو هېوادونو څخه دی

نړیوال بانک وايي چې د طالبانو تر واکمنۍ لاندې افغانستان د اقتصادي وضعیت له پلوه د نړۍ له بې وزلو هېوادونو څخه دی.

دغه بانک نن دوشنبه د تلې ۲۳ مه یو راپور خپور کړ چې پکې ویل شوي چې تر ټولو کم عاید لرونکي هېوادونه د افریقا په نیمه صحرا کې پراته دي، له ایتوپیا نیولې تر چاد او کانګو پورې او افغانستان او یمن هم په دغه لېست کې شامل دي.

راپور زیاتوي، د نړۍ شاوخوا ۴۰ سلنه بې وزله وګړي په دغو هېوادونو کې ژوند کوي.

د راپور پر بنسټ په بې وزلو هېوادونو کې د کورنیو کلنی عاید ۱۱۴۵ ډالره اټکل شوی دی.

د نړیوال بانک لوړپوړي اقتصادي کارپوه اندرمیت ګیل په دې اړه وویل: "کله چې ډیری نړیوال بنسټونه په ساده ډول د بې وزلو هیوادونو څخه ووتل، IDA یا نړیواله پراختیایی ټولنه د دوی ژوند لیک و."

د معلوماتو له مخې دغه هېوادونه له ۲۰۰۶ کال راهیسې په پور کې دي او په طبیعي توګه زیانمنونکي دي. نړیوال بانک په بې وزلو هیوادونو کې اوسنی وضعیت د کوویډ-۱۹ ویروس د خپریدو په پرتله ډیر خراب بللی دی.

په همدې حال کې به په څو ورځو کې د بې وزلۍ د له منځه وړلو د هڅو او د بې وزلو هېوادونو د حل په موخه د ۱۰۰ میلیارده ډالرو د راټولولو په موخه په واشنګټن کې د نړیوالې پراختیایي ټولنې (IDA) کلنۍ غونډه جوړه شي.

جمهورخبري آژانس