موږ د کډوالو په اړه اندیښنې د پاکستاني او ایراني چارواکو سره شریکوو

د ډنمارک د کډوالو شورا مشر د طالبانو د کډوالو او راستنیدونکو وزیر سره په یوه غونډه کې وویل چې موږ د پاکستاني او ایراني چارواکو سره د کډوالو په اړه اندیښنې شریکوو.

د جمهور خبري آژانس د خبر له مخې د طالبانو د کډوالو او راستنیدونکو وزارت نن پنشنبې (د وږي ۱۳مه) په یوه بیان کې وویل چې د دې وزارت وزیر مولوي عبدالکبیر د ډنمارک د کډوالو شورا (DRC) له مشرې شارلټ سیلنټ سره ولیدل او د هیواد په ختیځ کې د زلزلې له امله بې ځایه شویو او راستنیدونکو کډوالو سره د مرستې په اړه یې خبرې وکړې.

آغلې سیلنټ د هیواد په ختیځ کې د وروستۍ زلزلې د قربانیانو له کورنیو سره خواخوږي څرګنده کړه او ویې ویل چې د ډنمارک د کډوالو شورا خپلې بیړنۍ مرستې ختیځ افغانستان ته لیږلي دي.

د ډنمارک د کډوالو شورا مشر د افغان کډوالو د جبري شړلو په اړه اندیښنه څرګنده کړه او زیاته یې کړه چې هغه به د کډوالو په اړه اندیښنې د پاکستاني او ایراني چارواکو سره شریکې کړي او د ملګرو ملتونو د امنیت شورا د غونډې په څنډه کې به د اړوندو هیوادونو سره د افغان کډوالو ستونزې هم راپورته کړي.

مولوي عبدالکبیر په غونډه کې وویل چې د زلزلې له امله بې ځایه شوي کسان بیړنیو خوراکي او غیر خوراکي مرستو ته اړتیا لري.

طالبانو بې ځایه شویو ته د نغدي مرستو په ورکولو او د هغوی د کورونو په بیارغولو ټینګار وکړ، او زیاته یې کړه چې نړیوال سازمانونه باید د بې ځایه شویو سره د مرستې لپاره هیڅ هڅه ونه سپموي.

جمهورخبري آژانس