اسلام آباد کې افغان سفیر شکرالله عطف مشعل خبر ورکړی، چې افغانستان به راتلوونکې اوونۍ پاکستان ته خپل صادرات پیل کړي.
د
جمهور خبري آژانس د خبر له مخې نوموړي ویلي، د ژمنې سره سم به بله اوونۍ د تورخم، سپین بولدک- چمن او غلام خان بندرونو له لارې پاکستان ته د افغان سوداګرو د مالو د لېږد لړۍ پیل شي.
ښاغلي مشعل په خپله ټوېټر پاڼه د پاکستان د حکومت د دې پریکړې مننه کړې او هیله یې ښودلې چې دا کار به د دواړو هیوادونو ترمنځ د تخنیکي کمیټې د کار په پای کې په ټاکلې نیټه پیل شي.
نوموړي ویلي، هیله ده دا ټول به په ټاکلې نیټه باندې د دواړو غاړو ترمنځ د لارښونې د کمیټو د جون د ۱۵ څخه تر ۱۸ د تخنیکي غونډو وروسته پیل شي.
دغه راز افغان سفیر زیاته کړې، چې دوی د پاکستان حکومت سره د غلام خان بندر د ترانزیتي سوداګرۍ د پرانیستلو لپاره له نږدې کار کوي.
جمهورخبري آژانس:کابل