د ننګرهار په یوه روغتون کې د وسلو زېرمه موندل شوې

سیمه ییز چارواکي وايي، د ننګرهار ولایت په یوه روغتون کې یې د وسلو او مهماتو یوه لویه زېرمه موندلې ده.

د جمهور خبري آژانس د خبر له مخې دغه زېرمه د فاطمة الزهرا روغتون کې موندل شوې، چې ورڅخه بېلا بېلې وسلې او مرمۍ تر لاسه شوې دي.

راپورونه وايي، دغه ډېپو په یاد روغتون کې د وینې بانک د بیارغونې د کار پر مهال موندل شوې او داسې معلومېږي، چې په هېواد کې د داخلي جنګونو په وخت کې جوړه شوې وه.

امنیتي سرچینې وايي، په دغه ډیپو کې د سپکو او درنو وسلو مرمۍ او لاسي بمونه هم کشف شوي دي.

د سرچینې په وینا کشفي ادارې په دې برخه کې خپلو پلټنو ته دوام ورکوي تر څو په روغتون کې د بیارغونې د کارونو لپاره زمینه برابره شي.

د یادونې وړ ده چې په یاد روغتون کې خلکو ته د روغتیايي خدماتو وړاندې کول هم ځنډېدلي دي.

جمهورخبري آژانس:کابل