افغانستان کې د بشري حقونو رعایت ته هیله مندي ډېره شوې ده

د افغانستان لپاره د اروپايي ټولنې ځانګړي استازي تامس نیکلسن وايي، په دغه هېواد کې د بشري حقونو رعایت ته هیله مندي ډېره شوې ده.

د جمهور خبري آژانس د خبر له مخې نکلسن په یوه تازه مرکه کې ویلي، د افغانستان نوي حکومت نجونو او هلکانو ته د زده کړو اجازه ورکړې ده او د پوهنتونونو دروازې یې پرانیستې دي.

نوموړي زیاته کړې، داسې هیله مندي شته چې افغانستان کې د بشري حقونو وضعیت مثبت لوري ته روان شي، سره له دې چې دمګړی یې په اړه اندېښنې شته دي.

دی وايي، د افغانستان نوی حکومت یې هڅولی چې په کورني مشروعیت پسې وګرځي او د خپلو خلکو حقونو ته درناوی وکړي.

نیکلسن زیاتوي، تر دې دمه هېڅ اروپايي هېواد د نوي حکومت د رسمیت پېژندلو ډاډ نه دی ورکړی، خو له ټولو اړخونو سره مذاکرات روان دي، څو په افغانستان کې یو پیاوړی او ډاډمن حکومت رامنځ ته شي.

جمهورخبري آژانس:کابل