پاکستان له افغانستان څخه غوښتي، چې د داعش ډلې د خراسان څانګې مشر اسلم فاروقي دوی ته وسپاري.
د
جمهور خبري آژانس د خبر له مخې دا غوښتنه پرون پنشنبې د وري ۲۱مه د پاکستان د بهرنیو چارو وزارت په یوه خبرپاڼه کې له افغان حکومت څخه کړې ده.
په اعلامیه کې ویل شوي، اسلم فاروقي په افغانستان کې د پاکستان ضد لاس درلود نو ځکه باید دوی ته وسپارل شي.
پاکستان نه یوازې دا غوښتنه کړې، بلکې اسلام آباد کې یې افغان سفیرعاطف مشعل هم په همدې تړاو ورغوښتی د فاروقي په هکله ورسره د پاکستان نظر مطرح شوی دی.
خبرپاڼه کې د داعش د فعالیت په هکله د پاکستان د اندیښنې سربیره راغلي چې افغانستان او پاکستان باید د ترهګرۍ پر ضد مبارزې لپاره خپل فعالیتونه د ایجاد شویو میکانیزمونو له لارې همغږي کړي.
په ورته وخت کابل کې د پاکستان سفارت هم په خپل ټوېټر پیغام کې ویلي، فاروقي په افغانستان کې د پاکستان ضد فعالیتونو کې لاس درلود او د زیاتو پلټنو لپاره باید پاکستان ته وسپارل شي.
د یادونې ده، چې د افغانستان د ملي امنیت ریاست د شنبې په ورځ (وري ۱۶) د داعش خراسان د ډلې د مشر عبدالله ورکزي چې په اسلم فاروقي نوم مشهور دی د نیولو خبر ورکړ.
د ملي امنیت لوی ریاست ویل هغه د داعش د ۱۹ نورو جنګیالیو سره یوځای د ملي امنیت په ځانګړو عملیاتو کې نیول شوی.
اسلم فاروقي د ۲۰۱۹ کال په جولای کې په افغانستان کې ددې ډلې د پخواني مشر ابوعمر خراساني ځای ناستی ټاکل شوی و.
جمهورخبري آژانس:کابل