د کابل پر مرستیال امنیه قوماندان چاودنه، دوه پولیس په کې وژل شوي

پولیس تاییدوي، چې پلازمېنه کابل کې د امنیه قوماندانۍ د مرستیال په موټر چاودنې شوې او درې تنو ته په کې مرګ ژوبله اوښتې ده.

دغه چاودنه نن شنبې د مرغومي ۲۷ مه سهار مهال د کابل ښار د دریمې امنیتي حوزې اړوند د کابل پوهنتون د موترو ورستي تم ځای دهبوریو په سیمه کې شوې ده.

د کابل د پولیسو ویاند فرودوس فرامرز جمهور خبري آژانس ته و ویل، چې چاودنه د کابل د امنیه قوماندانۍ د مرستیال مولوي محمد نبي بیان په لنډ کرورز موټر شوې ده.

نوموړي زیاته کړه، چې په دغه چاودنه کې دوه پولیس وژل شوي او یو بل تن ټپي شوی دی.

دا چې چاودنه کې ښاغلي بیان ته زیان اوښتی که نه او د چاودنې نوعیت څه دي، فرامرز معلومات ورنه کړل.

تر اوسه د دغه چاودنې مسوولیت هم چا نه دی اخیستی.

جمهورخبري آژانس:کابل