د طالبانو له خوا د نجونو پر زده کړو بندیز هېڅ دیني بنسټ نه لري

د افغانستان د بهرنیو چارو پخوانی مرستیال حکمت کرزی وايي، د طالبانو له خوا د نجونو پر زده کړو بندیز هېڅ دیني او کلتوري بنسټ نه لري.

ښاغلي کرزي د نړیوال امنیتي فورم په ګردي میز کې د نړۍ له هېوادونو وغوښتل چې له طالبانو سره په خبرو کې د نجونو د تعلیم پر اهمیت ټینګار وکړي.

هغه زیاته کړه، افغانستان په نړۍ کې یوازینی هېواد دی چې نجونې له شپږم ټولګي وروسته ښوونځي یا پوهنتون ته نه شي تلای او نه هم کار کولای شي.

د هغه په ​​وينا، د نجونو پر زده کړو بنديز او د ښځو پر کار بنديز هېڅ توجيه نه لري او د "اسلام او افغاني کلتور" ريښه هم نه لري.

کرزي مخ پر ودې افراطیت او بې وزلۍ ته په اشارې سره خبرداری ورکړ، چې که د ځوانانو زده کړو ته پام ونه کړي، ترهګرې ډلې به دغه ځوانان جذب کړي.

د هغه په ​​وینا ځوانان د مایوسۍ او د پرمختګ د فرصت د نشتوالي له امله له ترهګرو ډلو سره یوځای کیږي.

کرزي د خپلو خبرو په یوه بله برخه کې په افغانستان کې د امریکا پر کړنو نیوکه وکړه او ویې ویل چې امریکا د «غچ اخیستنې» په فکر افغانستان ته ننوتې او د القاعده او طالبانو د غړو د نیولو سربیره یې په سلګونو کسان هم ونیول. عام افغانان یې د ګونتانامو او بګرام زندانونو ته ولېږل.»

نوموړي د سولې په برخه کې د طالبانو د لېوالتیا په اړه زیاته کړه، چې د طالبانو ډېر لوړ پوړي قوماندانان تسلیم شوي او د سولې وړاندیزونه هم شوي، خو موږ یې هېڅکله ونه منل، ځکه موږ سولې ته لېواله نه وو.

ښاغلي کرزي په افغانستان کې د اقلیمي بدلون خطرناکو پایلو ته هم اشاره وکړه، چې په کې د افغانستان په یو شمېر ولایتونو کې د مرګونو سېلابونه هم شامل دي، او ویې ویل چې "خلک هلته د طالبانو د رژیم له امله ځورېږي."

هغه وویل، طالبان د بشر ضد سیاستونو او د ملایانو په ګډون د حکومت د جوړولو له امله منزوي شوي او دغه وضعیت ټول هېواد ته ستونزې جوړې کړې دي.

جمهورخبري آژانس