کابل کې غبرګو چاودنو څلورو تنو ته مرګ ژوبله واړوله

امنیتي چارواکي تاییدوي، چې پلازمېنه کابل کې د دوه جلا جلا چاودنو له امله څلور تنو ته مرګ ژوبله اوښتې ده.

د جمهور خبري آژانس د خبر له مخې دغه چاودنې نن چهارشنبې د زمري ۲۹ مه د کابل ښار په ۱۲ مه او پنځمه امنیتي حوزو اړوند سیمو کې رامنځ ته شوي.

د کابل د پولیسو ویاند فردوس فرامرز وایي، لومړی چاودنه نن سهار ۶:۴۵ د ۱۲ مې امنیتي حوزې اړوند د ارزان قمیت په سیمه کې شوې ده.

د هغه په وینا دغه چاودنه د پولیسو په یوه رنجر موټر پسې د چسپکي ماین د چاودنې له امله رامنځ ته شوې ده.

دغه راز فرامرز زیاته کړه، چې دوهمه چاودنه نن سهار ۸:۷ بجې بیا د پنځمې امنیتي حوزې اړوند کمپنۍ په سیمه کې شوې ده.

دی وايي، دغه چاودنه بیا د معارف وزارت اړوند په یوه کرولا موټر پسې د نښلول شوي ماین له امله رامنځ ته شوې ده.

د کابل د امنیه قوماندانۍ د ویاند په خبره په دواړو چاودنو کې دوه تنه وژل شوي او دوه نور ټپیان شوي دي.

تر اوسه د دغه چاودنو مسوولیت چا نه دی اخیستی.

دا په داسې حال کې ده، چې پرون د افغانستان د خپلواکۍ د ۱۰۱ مې کلیزې په ورځ هم په کابل ښار ۱۴ توغندي ویشتل شوي وو، چې د چارواکو په خبره د ښځو په ګډون په کې ۱۰ تنه ملکي وګړي ټپیان شوي وو.
 
جمهورخبري آژانس:کابل