کونړ کې داعش او طالبانو تر منځ نښته شوې ده

په ختیځ کې د پوځ چارواکي وايي، کونړ ولایت کې د وسله والو طالبانو او داعش وسله والو تر منځ نښته کې دواړو لورو ته مرګ ژوبله اوښتې ده.

د جمهور خبري آژانس د خبر له مخې په ختیځ کې د ۲۰۱ سېلاب قول اردو مطبوعاتي دفتره ویلي، دغه نښته پرون جمعه د کونړ ولایت په چپې درې ولسوالۍ کې رامنځ ته شوې ده.

سرچینه زیاتوي، چې نښته په دقیق ډول د چپې درې ولسوالۍ د وچ ناوې او ګني په سیمو کې رامنځ ته شوې، چې په کې ۷ داعشیان وژل شوي، خو د طالبانو د مرګ ژوبلې په اړه یې څه نه دي ویلي.

دا په داسې حال کې ده، چې یادې قول اردو د تېرې پنشنبې په ورځ هم په چپه دره ولسوالۍ کې د طالبانو او داعش ترمنځ جګړه کې د دریو داعشیانو د وژل کېدو او یوه طالب د ټپي کېدو خبر ورکړی وو.

طالبانو او داعش تر اوسه په دې اړه څه نه دي ویلي.

جمهورخبري آژانس:کونړ